د راپورونو پر بنسټ د دغه سوداګر نوم ډایال سېنګ ښودل شوی چې تېره ورځ د مارچ په ۳۱مه له ماسپښین وروسته درې نیمې بجې د نامعلومو وسله والو لخوا په ډزو سره ووژل شو.
د هندي رسنیو د راپورونو له مخې تر دې یوه ورځ مخکې د پاکستان په کراچي ښار کې د بیرل ګیناني په نوم یو هندو ډاکتر هم وژل شوی و.
ګیناني د سترګو ډاکتر و چې د پنجشنبې په ورځ په خپل موټر کې په ډزو سره ووژل شو.
ټایمز اف انډیا ورځپاڼې په پاکستان کې د هندو او سېک مدافع فعالانو له قوله لیکلي، په تېرو دوو کلنو کې په دې هېواد کې لس سېکان وژل شوي دي.
د تېرو دوو ورځو پېښو مسوولیت لا تر اوسه کومې ډلې نه دی منلی.