د پاکستان جنګ او جیو ټي وي راپور ورکړی چې د شارجې د سټډيوم مسوولینو دوی ته تاییده کړې چې د افغان او پاکستاني ننداره چیانو د احتمالي شخړې د مخنیوي لپاره یې دا پرېکړه کړې ده.
تر اوس پورې د شارجې د سټديوم منتظمینو او د متحده عرب اماراتو کرېکټ بورډ په دې اړه رسماً څه نهدي ویلي.
د مهال وېش سره سم د افغانستان او پاکستان د کرېکټ ملي ټیمونه د مارچ په وروستیو کې د شارجې په نړیوال سټډيوم کې درې شل اووریزې لوبې لري.
د راپورونو له مخې تېر سپټمبر د اسیا کپ پر مهال په سټډیوم کې دننه د افغان او پاکستاني ننداره چیانو تر منځ د سختې شخړې د رامنځته کېدو وروسته د شارجې پولیسو څه باندې درې سوه افغان نندارهچیان او لسګونه پاکستانیان نیولي وو.
اوس مهال د افغانستان د کرېکټ ملي ټيم لوبغاړي په اماراتو کې د کوربه هیواد سره د درې شل اوریزو لوبو لپاره په تمرینونو بوخت دي.