د اسلامي پراختیايي بانک له لورې ۴.۲ میلیارد ډالر په اندازه دا پیسې به په راتلونکې دریېو کلونو کې اسلام اباد ته د تېر کال ویجاړونکو سېلابونو د بیا رغونې لپاره ورکول کېږي.
کارپوهان اقلیمي بدلون د دې سېلابونو لامل ګڼې او یو شمېر هېوادونو له پاکستان سره د مرستې ژمنه کړې ده.
د اسیا پراختیايي بانک هم د دوشنبې په ورځ په یوه اعلامیه کې ویلې دي چې په راتلونکو درېیو کلونو کې به پاکستان ته یو میلیارد ډالر ورکړي.
د امريکا متحدو ايالتونو هم ژمنه کړې ده چې پاکستان سره به سل ميليونه ډالره نور مرستې هم وکړي او اروپايي ټولنې بیا له دې هیواد سره د لس ميليونو ډالرو نوې مرستې اعلان کړی دی.
له پاکستان سره د مرستو د راټولونې په موخه پرون ملګرو ملتونو په جینوا کې یوه ځانګړې ناسته جوړه کړې وه چې له دې هیواد سره د ورستیو سیلابونو له امله اوښتې زیانونه جبران او په همدې ډول د اقلیمي بدلون لپاره دا هیواد چمتو کړي.